الأربعاء، 25 جوان 2008

عمار الأمريكاني.... و العرعور في الحجب


إي نعم فمة عمار أمريكاني.... أما لهنا طبعا النقاشات الكل تتم في شفافية و "عرعور" واسع النطاق قبل ما يجرى أي شي... على خاطر ما ينجم ما يعمل شي إلا ما يتعدى على الكونغرس... نهار لثنين إلي فات فمة سيناتور في مجلس الشيوخ طلب (بالنيابة على عمار الأمريكاني إلي بالمناسبة راجل كبير وإسمو "عمو سام") أنو موقع "يو تيوب" ينحي الفيديوات إلي "متعلقين بالارهاب".... طبعا قامت الطامة و العامة (شوف مثلا هنا)... على خاطر العنوان العام هذاية (شنوة هو "الإرهاب"؟ و شنوة معناها "يتعلق"بالارهاب؟) ينجم يخلط الحابل بالنابل حسب تعريف سي عمار (أو "عمو سام") و يمس "حرية التعبير" السلمية ذاتها....

أما في كل الأحوال شوفو، بما فيكم خويا عمار الباهي و الناس ملاح، محلاها الدنيا كي يتم فيها حتى الحجب في إطار النقاش العام و الشفافية.... نعرف إنت حشام أما يا أخي ما فيها باس كان تبعث واحد لمجلس النواب يقترح مثلا حجب الرديون و مبعد يحتجو بعض الناس... و تكتب مثلا جريدة "الصباح" تقرير على الموضوع... يا أخي إنت أقعد في بيروك... حتى حد ما يجي على ساحتك... نعرف... نعرف إلي إنت حشام... أما ما فيها باس يصير كل شي في إطار الوضوح و الشفافية

إي حقة مشيتشي تصيف... نسئل من جيهة المحبة هذيكة هي الحكاية...


هناك تعليقان (2):

عياش مالمرسى يقول...

salut, je voudrais bien participer à ce blog je pense que j'ai de bonnes idées.. voici un article de mon blog sur la censure pour rigoler un peu :p
http://3ayechmelmarsa.blogspot.com/2008/06/blog-post_26.html

Werewolf يقول...

يلزمك تخلّي لادراس امايل متاعك، ماهياش موجودة في البروفيل متاعك