عمار يقرأ في جريدة عالصباح يلقى إعلان زواج وحدة بنت حلال تتوفر فيها كل الشروط أما منين يا حسرة كيف ما يقول المصري ,الشهرية متكفيش كراء و ماء و ضو ودخان وقهاوي, الماكلة كل مرة يتلهمغ على حد و تسلك موش مشكلة. المفيد سي عمار ضرب خماسو في سداسو قال يلزمني ناخذ قرض و لا سلفة ولا حتى منحة يلزمني نعرس مغادش وقت علي الحديد غلى و الزيت و السكر و الدقيق و اليغورت و الحليب قعد كان بنادم رخيص. مشى للخدمة دخل لبيروه و حل الأورديناتور, عندو ليستة متاع المواقع و المدونات الي يلزمو يسكرها أيا بدا بالواحد بالواحد هو الحقيقة يحب خدمتو و متفاني فيها أما حكاية العرس عاملة فيه هالأيامات. الراجل قلق من كثر المواقع و نصف النهار مازال بعيد , قال توة بش نقعد كل مدونة نسكر فيها وحدها تي ماهو لكلهم يحبوا يعبروا بحرية انزل عليهم لكل فرد مرة , بش نقعد حياتي كاملة في البلوغسفير, أيا هو هكاكة ودخل عليه الشاوش : سمعت عمار ؟
عمار: اش فمة زادة عالصباح
الشاوش : المدير متاعنا فصعوا بيه
عمار مندهش: يزي يا راجل متقول هالكلام
الشاوش: والله كيف ما نحكيلك و المدير الجديد جاء و توة كيف هزيتلو القهوة
عمار : و علاش طيروه المدير
الشاوش : قالك مقصر في واجباتو و ماهوش يصنصر مليح و عندو ميول للديمقراطية و حرية التعبير
عمار ينفجر ضاحكا : ميول لشكون هههههههه تي الراجل يصنصر 24/24 كان يلقى لما التيليكوم يصنصرلها الريزو
الشاوش: مالا يا سيدي المدير الجديد قالك أعظم منو و ربي يستر كان ما صنصرنا أحنا من الإدارة ههههههه
خرج الشاوش و قعد عمار يخمم كيفاش بش يقابل المدير الجديد و يربح ثقته و فيسع تفتق مخو على فكرة شرع في تنفيذها في الحال . مد ورقة و ستيلو و بدا يقيد في المواقع و المدونات عاري و لابس الي معارض و الي مؤيد والي لاهو لاهو و الي داخل في حيط الحاصل جمل 5 ورقات حطهم في ملف و مشا يقابل في المدير. دخل للبيرو يتبسم لقى المدير جنبة هو بيدو راسو قد ايكون متاع الأورديناتور جفل عمار و بدا يخمم بش يخرج
المدير : اتفضل يا ولدي , تخدم هنا انتي ؟
عمار : اي نعم سيدي المدير
المدير: و مسيب بيروك ماو لاباس ؟ المدونات نهار الكل تكتب يجعلناش نصكروا شطرهم وانتي تحوص من بيرو لبيرو
عمار: سيدي المدير انا جيت في نفس الموضوع
المدير: جايب ملف و جاي تكركر في ساقيك, ماهو حل فمك مالأول, شنوة هذا ؟ شبيهم الماقع هذم ؟
عمار : مخطرين و يلزمهم يتصكرو
المدير : فيسبوك , ايوه هاي 5 , علاش لا , بلوغسفير , اي متنساهوليش هذا , شنوة الله يهلكك الغووغل زادة
عمار: اي نعم ماهو الغووغل سبب الكارثة
المدير: صكر جد بوه , شنوة آخر
عمار : اكهوة سيدي المدير
المدير: اسمعني , جاني تليفون ليوم باش نعملو حملة مراقبة على نوامر تليفونات متاع جماعة حبيبات, معارضة و حقوق الإنسان ماهو تعرفو الخدمة كيفاش ؟
عمار: بالطبيعة مالا شنية الصنعة
المدير: ايواش عيش ولدي مالا حظرلي مجموعة تختارها انتي بش تباشرو الصنصرة
عمار: سيدي المدير عندي طلب كان متراش مانع
المدير : اتفضل
عمار: راني نويت نستحسن و ذا بي على قرض
المدير: لا يا ولدي, حكاية الفلوس نحيها من مخك ,كان رضات الي بش تاخذها بحالتك مكانش موش لازم , وانتي لواه معرس ؟ آش خير من واحد عازب يا ولدي الحرية راهي نعمة من عند ربي, الي نعملوه احنا للعباد يرجعلنا من نسانا راهو اسأل مجرب ....هيييييييييييه يا ليتني معرست, كان تعرس بالحرام لما نقصلك في بونوات ليسنس
عمار: معنديش بونوات ايسنس
المدير : مالا في تيكات الرستو
عمار: الرستو مسكر عندو عامين , مفماش فلوس بش يطيبو
المدير: اخرج علي و ما تنساش شقتلك بش تعمل
عمار: هاني خارج متصيحش
و رجع عمار لبيروه و شد الجريدة و حل صفحة الرياضة و......هزو النوم
الاشتراك في:
تعليقات الرسالة (Atom)
ليست هناك تعليقات:
إرسال تعليق