الجمعة، 11 جويلية 2008

منو هكة يلزمك رخصة بش تحل مدونة... الحجب على قاعدة مازال مابداش... يا حسرة على عمار

لشهرة لخرة الناس الكل إلي مهتمة بوضع الإعلام العربي تستنى شنوة بش يكون مصير ما يسمى بـ"وثيقة وزراء الإعلام" العرب إلا مازالت في مرحلة النقاش و إلي فيها على ما يبدو مقترحات ترعب و عموما تتلخص في أنها بش تحقق "وحدة عربية في الحجب".. الحاسيلو حسب جريدة "القدس العربي" متاع اليوم فمة تقرير إخباري (هنا) جاب معاه أخبار خايبة برشة و ماطمنش... مصر بوصفها "الرائدة عربيا" مش بش تقعد تستنى في "وثيقة وزراء الإعلام" و تحقيق مشروع "أمة عربية واحدة في الحجب" و بادرت هي للتأسيس التشريعي متاع الوضع المستقبلي و خاصة كيفاش بش يراقبو أعضاء "الجهاز القومي" لمكافحة المدونات و غيرها من الأوبئة حاشانا و حاشاكم (و إلي بالمناسبة الأعضاء هذوم مش إلي جي بيناتهم وزير الخارجية و رئيس المخابرات) يراقبو عادة قلت المجالات إلي توة فالتة نسبيا من المراقبة يعني بالأساس البث الفضائي و الانترنت و خاصة المدونات و الفايسبوك.... هاو فحوى القانون إلي من المنتظر بش يتمرر في مصر إلي هي تتسمى "جنة" إعلامية مقارنة ببرشة أقطار عربية (و إلي نشرتو صحيفة "المصري اليوم" قبل ما تنشرو "القدس"): "وبموجب نص القانون الذي نشرته صحيفة المصري اليوم امس الاول فان الجهاز الجديد يديره مجلس ادارة برئاسة وزير الاعلام ويضم في عضويته ممثلين عن وزارتي الداخلية والخارجية وجهاز المخابرت العامة وأحد نواب رئيس مجلس الدولة (..) الي شخصيتين عامتين، وسيختص بمنح التراخيص لكل عمليات البث الاعلامي للجمهور بما في ذلك عبر الانترنت، ما اعتبر اول محاولة للسيطرة علي المدونات والـ فيس بوك التي تحولت مؤخرا لساحة هامة للمعارضة السياسية وكشف انتهاكات حقوق الانسان ما ألحق ضررا محليا ودوليا واسعا بصورة النظام... وحسب النص يعاقب بالحبس وبغرامة لا تقل عن مقابل الترخيص ولا تتجاوز ضعفه أو بإحدي هاتين العقوبتين كل من قام دون الحصول علي ترخيص من الجهاز بالبث أو إعادة البث أو التوزيع أو التشغيل لخدمات البث المسموع والمرئي، وتكون عقوبة الحبس وجوبية في حالة العود. وفي جميع الأحوال تحكم المحكمة بمصادرة الأجهزة والمعدات التي استعملت في ذلك النشاط"... إي نعم بالتراخيص... بش تحل مدونة منو هكة في مصر يلزمك رخصة من أقرب بلدية و مش معروف شنوة بش يولي أصعب رخصة قهوة و إلا رخصة مدونة... و إلي ما ينضبطش يشد الحبس و يفصعولو بالأورديناتور...

أما أنا شخت بصراحة في تقرير القدس على الفقرة إلي على الصراعات بين الوزراء متاع الإعلام العرب... يلزم أولا يتسجل للتاريخ إلي الدول العربية إلي رافضة للتوجهات الجديدة هي قطر و الامارات و ليبيا و لبنان و عمان.... أما الجملة إلي تعمل الكيف هي التصريح متاع ممثل السعودية في الاجتماعات لخرة لأنو الحقيقة متاع ربي إنسان صريح يعمل ستة و ستين كيف.... قالك يا سيدي: "حرية التعبير نشرت الفساد في العالم العربي، واصبحت تستغل من اناس يريدون جنازة ويشبعون فيها لطم"... هاو الرسمي!!! قالو تبهنيس و هات من أك اللاوي... آش فمة وضوح أقوى من هكة... يظهرلي المرحلة إلي عشناها في السنوات إلي فاتت كانت "ربيع الحريات" و نحنا مافي بالناش... يا حسرة على عمار و جو عمار و حنية عمار...


هناك تعليقان (2):

3amrouch يقول...

تقول انت عمار حنين في الاصل ام الخبزة المرة لازتو
كان فقط ينفذ في الاوامر وجندي مامور
وانو فمى نوع جديد من الاوباش شادة مراكز القرار وباش تولي تتدخل شخصيا لتكميم الافوام
امى يظهري القانون محضرينو لغاية في نفس يعقوب مانتخيلش انهم باش يشدو عساس على المدونات الكل لكن منو هكه الي يفوت الخط الاصفر على خاطر لحمر مستحيل الوصول ليه يتعداول للدار ويهزوه بدبشو وباثاثو وديراكت لبوفردة مدام كل شيء بالقانون وطبق القانون وماعداش تصير شوشرة كيما شوشرة كريم عامر لانو عمليا انت تخدم من غير رخصة هههه
هذي يسميوها حرب استباقية تو في تونس يشدوك ومن بعد يبربشو في الماضي عندكش مخالفة ولا خطية قديمة ويحاسبوك عليها توا القضية جاهزة وحاضرة ياويحو الي يطيح
ادعي معايا فقط عمار مايفيقش بالهدرة ويقعد يحجب فقط هههههههه
ريت رجعنا نحنو لعمار وايامو موش قالك شد مشومك
طارق
شكرا
واصل بربي في نقل المعلومة الرفيعة والمهمة ولا داعي لمحاولة حتى الرد على بعضهم هاو زادو "نقلو" فتوى جديدة

Big Trap Boy يقول...

يا والله مهازل

موش على الأقل كان عملولنا كرّاس شروط خير؟

:)