في نقد غرّة جويلية

كيف ما شفتوا جا نهار حرية التعبير و الّي حب يتكلم تكلم و فرغ قلبو.. أما بيناتنا، مَبْعد المطالبة بتعبير حر على التعبير الحر بيدو. ياخي نطالبوا نطالبوا لغدوة، شنوّا الفايدة كي نبداو أحنا مش مقتنعين ولاّ حتى مش فاهمين معنى الحرية هاذي؟ ياخي المدونين محترمين حرية التعبير متاع المدونين لخرين؟؟ آنا نتصور باش لبلاد تكون حرة، لازم المدونين الّي يمثلوا مجتمع مصغر يكونوا مثال متاع قبول للتنوع و الإختلاف.. و مش قبول رمزي متاع شعارات قزوردية، بل تجمّع متاع مدونين مافيهمش زوز كيف كيف، كان ما نلقاوش الآراء الكل راو ثمة حاجة سافابا.. وينهم المدونين الماركسيين؟ وينهم مدونات الحركات النسائية؟ علاش أغلبية المدونين مالعاصمة؟ علاش ما ثماش مدونين خوانجية كي ثمة مدونين كفار؟؟ هاذي النقطة لولى لي حبيت نحكي فيها و هي البداية بأنفسنا في فهم حرية التعبير و إعطائها للآخر و قبول الإختلاف لتكوين تجمّع افتراضي يشمل كل عناصر المجتمع دون تمييز. الحاجة الثانية لي حبيت نحكي فيها، هي معنى "المطالبة بحرية التعبير" ماو كان تطالب بيها هاك تعبّر و كان ما ثماش حرية تعبير راو مانجمتش تطالب بيها.. معنتها مالازمش نطالبوا و نحنا مكتفين إيدينا أما نعبروا و ما نحكيوش فيها لحكاية خاترها "ديباسي".. كيف ما يقولوا الحرية ما تتعطاش، تتفك. خاتر بيناتنا، كان تستنّاو في واحد خامج كيف عمّار باش يبعثلكم جواب للدار يقوللكم اسمعوا لولاد عندكم الحق أيا برة عبروا يبطى شوية راو.. كان مش برشة.. ماو خايفين؟؟ نحيو أمّو الخوف خاتر شعب خايف عمرو لا باش ياخذها الحرية..تحبّوا تعملوا أوملات من غير تكسير العظم؟؟ مستحيل.. التضحيات لازمة، و آنا في نظري، الحرية و الديمقراطية تستحق أكثر تضحيات من قضايا أخرى.. تي بورقيبة و مانديلا شدّوا الحبس باش نجيو نحنا نخافوا من كلمة؟؟؟ كلمة؟؟ قولوها و فوتونا منّو ها واحد جويلية.. مش عاجبتكم حالة الدولة؟ اكتبو تدوينة عنوانها ما لا أحب في سياسة زين العابدين بن علي.. شفيها؟ مش ممنوع راو.. تخافوا من كلمة "زين العابدين" ؟ مش مشكل بالوقت و التدريب تو تترخفوا.. قبل كانوا يخافوا من كلمات من نوع تعذيب و نظام توّا ماعادش.. حان الوقت الآن باش "نديبلوكيو" بعض الكلمات الأخرى في قاموس الحجب الذاتي. بقات نقطة أخيرة نحب نتعرضلها، وهي طريقة المطالبة بحرية التعبير. نعرفوا الكل لي عمّار و أتباعو في عديد الوزارات (ريتو ديبلوكيت كلمة وزارة) بهايم مافاهمين منها الشي.. مازالوا في مستوى التفشيخ و تكسير العظام باش يكبتيو حرية التعبير؟ قلت آنا علاش مطالبنا ما تكونش محدّدة أكثر؟ معنتها في بلاصة تقول نحب نعبر تقول نحب نعمل فيلم على الحبوسات و ناخذ حقي في سينما مستقل عن مراقبة الدولة. و هكذا دواليك لين نوصلوا نعملوا ليستا متكونة من عدة نقاط صغيرة و محدّدة للغاية تنجم الدولة تفهمها و تشوف هي أمورها.. و نقدم الإقتراح هاذا بصفة رسمية للمدونين الكل و نستدعاهم لأعطاء آرائهم في هذه القائمة، من اسمها للنقاط لي فيها.. خلي عالأقل نخرجوا من مرحلة المطالبة الرمزية للمطالبة الفعلية.. و في وقت نخليو فيه الشباب ذو المدارك العقلية الناقصة في الدشرات يشارك فالإقتراحات القزوردية المخلطة بالماء نبداو نحنا نستخدموا الذكاء التونسي باش نفهمو مطالبنا و نحددوها برصانة بعيدا عن التهاتفات و الرمزيات (نخلّيو الشي هاذا للفنانين هذاكا دورهم) .. هاذا شحبيت نلاحظ بكل تواضع و نتمنى أنو تكون فكرة القائمة عجبتكم لأني أرى فيها مخرجا لمرحلة أحلى و أهم، لنا و لتونس الحرّة، الّي تبقى هي هدفنا و حلمنا المشترك