الأربعاء، 2 جويلية 2008

في نقد غرّة جويلية

كيف ما شفتوا جا نهار حرية التعبير و الّي حب يتكلم تكلم و فرغ قلبو.. أما بيناتنا، مَبْعد المطالبة بتعبير حر على التعبير الحر بيدو. ياخي نطالبوا نطالبوا لغدوة، شنوّا الفايدة كي نبداو أحنا مش مقتنعين ولاّ حتى مش فاهمين معنى الحرية هاذي؟ ياخي المدونين محترمين حرية التعبير متاع المدونين لخرين؟؟ آنا نتصور باش لبلاد تكون حرة، لازم المدونين الّي يمثلوا مجتمع مصغر يكونوا مثال متاع قبول للتنوع و الإختلاف.. و مش قبول رمزي متاع شعارات قزوردية، بل تجمّع متاع مدونين مافيهمش زوز كيف كيف، كان ما نلقاوش الآراء الكل راو ثمة حاجة سافابا.. وينهم المدونين الماركسيين؟ وينهم مدونات الحركات النسائية؟ علاش أغلبية المدونين مالعاصمة؟ علاش ما ثماش مدونين خوانجية كي ثمة مدونين كفار؟؟ هاذي النقطة لولى لي حبيت نحكي فيها و هي البداية بأنفسنا في فهم حرية التعبير و إعطائها للآخر و قبول الإختلاف لتكوين تجمّع افتراضي يشمل كل عناصر المجتمع دون تمييز. الحاجة الثانية لي حبيت نحكي فيها، هي معنى "المطالبة بحرية التعبير" ماو كان تطالب بيها هاك تعبّر و كان ما ثماش حرية تعبير راو مانجمتش تطالب بيها.. معنتها مالازمش نطالبوا و نحنا مكتفين إيدينا أما نعبروا و ما نحكيوش فيها لحكاية خاترها "ديباسي".. كيف ما يقولوا الحرية ما تتعطاش، تتفك. خاتر بيناتنا، كان تستنّاو في واحد خامج كيف عمّار باش يبعثلكم جواب للدار يقوللكم اسمعوا لولاد عندكم الحق أيا برة عبروا يبطى شوية راو.. كان مش برشة.. ماو خايفين؟؟ نحيو أمّو الخوف خاتر شعب خايف عمرو لا باش ياخذها الحرية..تحبّوا تعملوا أوملات من غير تكسير العظم؟؟ مستحيل.. التضحيات لازمة، و آنا في نظري، الحرية و الديمقراطية تستحق أكثر تضحيات من قضايا أخرى.. تي بورقيبة و مانديلا شدّوا الحبس باش نجيو نحنا نخافوا من كلمة؟؟؟ كلمة؟؟ قولوها و فوتونا منّو ها واحد جويلية.. مش عاجبتكم حالة الدولة؟ اكتبو تدوينة عنوانها ما لا أحب في سياسة زين العابدين بن علي.. شفيها؟ مش ممنوع راو.. تخافوا من كلمة "زين العابدين" ؟ مش مشكل بالوقت و التدريب تو تترخفوا.. قبل كانوا يخافوا من كلمات من نوع تعذيب و نظام توّا ماعادش.. حان الوقت الآن باش "نديبلوكيو" بعض الكلمات الأخرى في قاموس الحجب الذاتي. بقات نقطة أخيرة نحب نتعرضلها، وهي طريقة المطالبة بحرية التعبير. نعرفوا الكل لي عمّار و أتباعو في عديد الوزارات (ريتو ديبلوكيت كلمة وزارة) بهايم مافاهمين منها الشي.. مازالوا في مستوى التفشيخ و تكسير العظام باش يكبتيو حرية التعبير؟ قلت آنا علاش مطالبنا ما تكونش محدّدة أكثر؟ معنتها في بلاصة تقول نحب نعبر تقول نحب نعمل فيلم على الحبوسات و ناخذ حقي في سينما مستقل عن مراقبة الدولة. و هكذا دواليك لين نوصلوا نعملوا ليستا متكونة من عدة نقاط صغيرة و محدّدة للغاية تنجم الدولة تفهمها و تشوف هي أمورها.. و نقدم الإقتراح هاذا بصفة رسمية للمدونين الكل و نستدعاهم لأعطاء آرائهم في هذه القائمة، من اسمها للنقاط لي فيها.. خلي عالأقل نخرجوا من مرحلة المطالبة الرمزية للمطالبة الفعلية.. و في وقت نخليو فيه الشباب ذو المدارك العقلية الناقصة في الدشرات يشارك فالإقتراحات القزوردية المخلطة بالماء نبداو نحنا نستخدموا الذكاء التونسي باش نفهمو مطالبنا و نحددوها برصانة بعيدا عن التهاتفات و الرمزيات (نخلّيو الشي هاذا للفنانين هذاكا دورهم) .. هاذا شحبيت نلاحظ بكل تواضع و نتمنى أنو تكون فكرة القائمة عجبتكم لأني أرى فيها مخرجا لمرحلة أحلى و أهم، لنا و لتونس الحرّة، الّي تبقى هي هدفنا و حلمنا المشترك

هناك 22 تعليقًا:

Tarek طارق يقول...

عياش بالمرسى... أولا ماذابية كيف تحب تستعمل مصطلحات معينة (مثلا "ر.و الخوف") إستعملها في مدونتك الخاصة... هذية مدونة جماعية فما ناس تعتبر كلمة كيف هكة "سب جلالة"... و تتقلق منها.. كنا حكينا في الموضوع في مدونة رديون
http://radyountunis.blogspot.com/2008/06/blog-post_2542.html

ثانيا، أنا يظهرلي مسألة الخوف مسألة معقدة برشة خاصة كيف نتحدثو بشكل واقعي... مثلا إنت ما تستعملش إسمك الحقيق في مدونتك... يظهرلي يلزمك تتحلى بشوية تواضع كيف تتحدث على مواجهة الخوف...
ثالثا، أنا ما فهمتش شنوة تقصد بـ"التفاهات" و "الرمزيات"... ماذابية تزيد تفسرلي
رابعا، موافقك على فكرة القايمة متاع مطالب محددة... علاش لا؟ أبدى القايمة هذية و الناس تنجم تزيد في تدوينات جديدة في المدونة هذية

عياش مالمرسى يقول...

أما محلاها يا طارق كيفاش تمنعني من استعمال كلمة في مدونة معمولة ضد الحجب..هذايا بالضبط على شنوّا كنت نحكي كي قلت رانا ماناش فاهمين حرية التعبير.. أما مش مشكل عدم استعمال الكلمة ما يقلقنيش و نعتذر ملّي تقلقوا الكل راني إنسان تلقائي برشة وا كهو..
مسألة الخوف صحيح أنها معقدة برشة و عدم التواضع طريقة في الكتابة لا غير، نعرف بلقدا صعوبة الشجاعة.. و زيد ما نيش متخبي اسم المدونة متاعي عملتو خاتر عجبني و عمرو لا كان طريقة باش نقعد مجهول، و الدليل على هذا أني في فايسبوك بوجهي و صورتي و اسمي شاركت في حوارات و قدمت المدونة متاعي و إيما بنجي شاهدة على هذا..
نقصد بالرمزيات كل الإحتجاجات ذات جمل رنانة الّي عمرها ما بدلت حاجة، صحيح عندها بلاصتها أما على شرط تكون محاطة بأفكار رصينة و مطالب منظمة تنجم الدولة تفهمها خاتر كيما قلت عمّار ما يشم شي من حكاية حرية التعبير و ما يفهمناش من أصلو كي نعبروا..
و حكاية القايمة نشاله نبداها في أقرب وقت ممكن تو تفهموني شنوة قصدت..
و مزيد الإعتذار لسب الجلالة.. :)

titof يقول...

بربي قسرهالي نحيو ر..الخوف على خاطر رب الخوف هو الله
وشنية حكاية الخوانجية ولا تلوح في الكلام هكاكة
تعرف شمعناها خوانجية ولا دخلها فركة وعود حطب
اطالب وفي هدوء تعديل بعض النقاط في هذه التدوينة
او سحبها
هذه مدونة جماعية تحمل توجه جماعي ومحاولة شخصنتها هو قتل لها

عياش مالمرسى يقول...

يا تيتوف يظهرلي اعتذرت لسب الجلالة.. تحبّو تصنصرو مقال في مدونة ضد الحجب أموركم أما خممّوا في رمزية الجاست هاذا..

Tarek طارق يقول...

عياش من المرسى... شوف أنا كان جيت نحب "نمنعك" راني منعتك... الحديث على "المنع" و الخروج في موقع الضحية خارج الموضوع... أنا قلت هذا جديد و متحمس و يحب يبلغ فكرة قلت خلي نلفت النظر متاعو... و إنت توة إعتذرت... و يكون هايل برشة لو وحدك تبادر بتنحية الكلمة... لكن إنت المطلوب منو القيام بهذاكة و حتى حد ما هو بش يعملها في بلاصتك...

عياش... التدوين الجماعي (كيف بالمناسبة "النضال الجماعي") خاصة كيف يكون الهدف منو الدفاع على قضية جامعة و شاملة كيف هكة تعني فيما تعني أنو ناخذو بخاطر بعضنا... بش انجمو نقدمو القدام... و لهذا الأشياء إلي مش لازمة (كيف "سب الجلالة" خاصة أنو فكرتك واضحة من دونها) مانراش علاش نخلويها تفسد حاجات ما أهم... و من الزاوية هذية حبيت نلفت النظر متاعك... خاصة أنو ما فماش في حتى بلاصة في العالم عمل و إلا مجال فيه حرية تعبير مطلقة... الناس الكل تمتنع على عملان حاجات في مقامات معينة و أوقات معينة ممكن تعملها في مقامات أخرى و أوقات أخرى... و لهذا المزايدة حول المنع و الحجب مش ضرورية زادة... و أنا حطيتلك الرابط متاع حوار رديون بش تاخذ فكرة على شنوة نقصد... و كان عندك اعتراض على الأفكار الواردة فيه ماذابية نسمعها... و ندعوك بالمناسبة بش تشارك معانا في حوارات مقبلة في رديون...

و نستنا في القايمة... كيف ما قلت مقترح مهم

عاشور الناجي يقول...

ما محلاها يا طارق كيفاش تمنعني من استعمال كلمة في مدونة معمولة ضد الحجب..

:))))


بدون تعليق

أو بيدون زيت

:)))

ربك يا عياش ، موكش تشوف في خوانجية؟ إماله الوخيان الي عيطولك هنا ماويين ولا من جماعة الفارك ؟


و جاي تكتب و جادد عليك حرية تعبير
!!!!


تعرف أنه برشه و منهم أنا أصلا ما قال لنا حد ايجا شارك



و رب الخوف ميش سبان جلالة و حتى كان فهذا حقك و معتقداتك و الي يبلطفتك بأي كلمة يكذب عليك

تي هو أصلا موش عارف معنى الرب و الأرباب في اللغة العربية

ربي و عيسى و محمد و بوذا و البابا رموز دينية من حقك في أي مجتمع يحترم نفسه تمزبلها كيما تحب، و أي مثقف يحترم نفسه ما يعملش مدونة ضد الحجب باش تكون سلاحه هو لحجب مايحب و فرض وصايته و تمرير شوية رمل بالمناسبة وبالمناسبة زاده

زايد ....

عياش مالمرسى يقول...

فاهمك يا عاشور و نتصور بجملتي هوما فهموا زادة زايد باش تتحمس و تاتاكيهم خاتر ممتلكي الفضاء يسنّوا قوانينو... تعرف الّي آنا ما نشكش لحظة لي ربي رمز انجم نستعملو كي ما نحب في مجتمع متطوّر أما توّا في المرحلة هاذي بالتحديد كان نمشيو يد في اليد مع المختلفين منا خير، خاتر لي يجمعنا أكبر ملّي يفرقنا، و نتصور لي حبنا للحرية ينجم يتجاوز كلمة ربي ببرشة..

titof يقول...

شكرا عياش على التفهم
والتعليق لخر متاعك يدل على مدى انفتاحك وقبولك للاخر
معندي منضيف ويعطيك الصحة مرة اخرى

titof يقول...

يا هالك
سيب الشباب اللاديني رايض ومتبداش تدفع فيه لصدمات مجانية مهوش وقتها وراي الفتنة ميربح منها حد

Ezzabrat يقول...

ياخي بربي(ربي كلمة و تتقال راهو),ما نجموش احنا نهار نحكيو في موضوع ما غير ما نجبدو حكاية الدين المحنونة...
انا نتصور عمار يضحك علينا توا...راهو يقول ملا جماعة..تي هاوم في وسط بعضهم هابطين ريش...

''بالمناسبة ''..علاش عاشور ما هوش مسجل في ضد الحجب،ماهو الا منهج تفكيري صحيح مختلف عالاغلبية لكن عندو الحق فالوجود...و لا دار النجار بلاش باب و نقاومو الصنصرة بالصنصرة؟؟؟؟؟

Werewolf يقول...

أنا نتصورو مجرد سهو و ما ثماش علاش ما تمش إضافة أي مدون يرغب بذلك، قضية الحجب تمس الناس الكل و ماهياش مقتصرة على مجموعة معينة، عمرها ما كانت سياسة الإقصاء توصّل لحاجة

3amrouch يقول...

طارق
من رايي موش كل واحد نعملولو قدر وقيمة ونقعدو نضيعو وقتنا نفسرولهم
يوليش كل فرخ زادة ناقص شوية احاسيس ولا ببوش بو مصة يجي يكتب كلمتين سبان باش يجبد الاضواء نوليو نهبطو لمستواه ونقعدو نفسرولو ويولي شهيد القضية وضحية ومسكين...
اعمل ميثاق باش تلتزم بيه الناس الكل وتبقى لهيئة التحرير الحق في قبول التدوينة او رفضها
نخدمو على الكيف موش الكم
ربى فئة قليلة خير من كثيرة

فمة مدونة فرنسية متاع اخبار عاملة بلاصة للتعليق والملاحظات كل واحد عندو الحق باش يساند التعليق ولى يرفضو مع تقديم الاسباب للرفض وتتخذ الهيئة الامر بسحب التعليق لاحظ انو حكيت على تعليق فمبالك بتدوينة كاملة
فهمتني طارق؟

3amrouch يقول...

Werewolf @
خلينا نكونو صادقين مع انفسنا ونقولو كلمتنا بصدق
شخصيا انا ضد وجود الهالك وامثالو
انتوما كيف تحب تلعبو بالكلمات وتسميوه سهو اوغيرو اموركم هذيكه
الناس الي تصطاد في الماء العكرامثال الهالك واعوانو الي يالبو في الراي العام ويبعثو في الايميلات للناس لتحريضهم ماحجتناش بيهم
هذا راي الشخصي ومايلزم حد

titof يقول...

عمروش
تو جاب ربي قدام عنيهم الراجل في التعليق متاعو يحرض ويشعل في الفتنة خلي ما لا كي يولي يدون
اول بوست يكتبو اسمو الاسلام هو عمار 404
وبرا عاد وقتها اش باش يفضها
اما عجبتني حكاية السهو وحكاية صادقين مع بعضنا
هههههههههه
احنا مشكلتنا الي مناش صدقين مع روحنا ومع بعضنا زادة

Werewolf يقول...

@عمروش:
أنا مانيش أدمين في المدونة لكن شخصيا أنا زادة ما عندي حتى مانع باش عاشور أو غيرو ينضم للمدونة رغم اللي ما نوافقوش في أفكارو أو الطريقة و الألفاظ اللي ممكن يستعملهم... مانيش موافقك زادة وقتلي تنعتو بالهالك

عياش مالمرسى يقول...

"من رايي موش كل واحد نعملولو قدر وقيمة ونقعدو نضيعو وقتنا نفسرولهم".. "يوليش كل فرخ زادة ناقص شوية احاسيس يجي يكتب كلمتين سبان باش يجبد الاضواء" ..فيبالك عمروش لي إنتي ما احترمتنيش وقتلّي آنا احترمت الناس الكل؟ يا عمروش، القدر و القيمة مش إنتي تعملها ولاّ تعطيها للعباد، و في استعمالك لكلمة فرخ، عطيت الدليل لي إنتي هو ناقص رزانة في الحكاية.. يظهرلي كلامي كان واضح و الكلمة نحيتها، علاش تكملوا تشعلوا النار؟ كل واحد عطى رايو و كل واحد فهم لاخر،هيا نتعدّاو...

Tarek طارق يقول...

عياش من المرسى... تنحيتك للكلمة هذيكة يتحسبلك و دليل على إيمانك بأهمية التوافق مش الاستفزاز(و يظهرلي حتى من الجمالية "أمو الخوف" أحلى ببرشة)... و على كل الحال توة نمشيو لما هو أهم: القايمة إلي وعدتنا بيها...

و بالمناسبة إلي يستخايل عندي الوقت و إلي وسع البال لعملان "مؤامرات" ضد مدونين معينين فإنو يغلط... خاصة كيف يتعلق الأمر بشلايك... بالنسبة للمسطكين إلي يخممو بالطريقة هذية نقول: إذا كان جا الاستدعاء للمشاركة في المدونة هذية قايم على موالاة فكرية أو إيديولوجية أو سياسية (و إلا حتى شخصية) راهو برشة أسماء ماتبداش موجودة... و بالتالي التخرنين حول الموضوع هذاية و محاولة تحويل وجهة و أهداف مدونة "ضج الحجب" نحو متاهات أخرى مجرد حرث في البحر

توضيح آخر للمسطكين فقط: بالنسبة للمشاركة في المدونة... الاستدعاء للمدونة يستوجب توفر إيمايل (عنوان إلكتروني)... الناس إلي تبعثتلهم دعوات هومة يا إما ناس متوفرة العناوين متاعها في مدوناتهم أو عند القايمين على المدونة... يا إما ناس بعثت عناوينها... و يظهرلي عياش من المرسى نفسو مثال على الحالة الثانية...

باقيها... نرجعو توة للي بيه فايدة

عاشور الناجي يقول...

شلايك ؟؟

عنواني موجود في مدونتي
و طلبت أكثر من مرة في أكثر من تعليق نشارك

أما كيف وليت شلايك

و قريت ردك
و رد عمروش

السماح

بارك الله فيك و فيه
و في أخلاقكم العالية
و جعلكم الله ذخرا لهذاالوطن
و لقضية حرية التعبير

غير معرف يقول...

''الله '' يهديك يا طارق...
توا بالزهر في رديون عملتو حوار عالسبان و الشخصنة...
و وقتلي ازواو ذكر وجوه الكلاب(و ناكدلك ما كانش ليك الكلام ) تنبزت..
و هاك اليوم تنزل لمستوى الشلايك بالرغم اللي ديما تقلي اللي يسب ماهوالى يطيح في قدر روحو ام
C'est l'hopital qui se fout de la charite

Tarek طارق يقول...

شوف "زبراطمنجينيف" أنا فمة نوعية من الناس و بالتحديد المدون هذا ما نقدرهمش على طول الخط... عندي ما يكفي من الأمثلة إلي تخليني نتصرف معاه بالشاكلة هذية (في حالات أخرى سابقة مع مدونين أخرين القدر متاع العمر و أشياء أخرى يمنعني من الدخول في عرك من النوع هذا)... و المثال لخر هو التعليق متاعو الفوق (و بين قوسين توة وين قريت إلي يحب ينضم للمدونة) مش متاع واحد جاي يطلب أنو يساهم مع المجموعة في التدوين ضد الحجب... كلمة الشلايك توصيف للتصرف هذاية... مش للشخص...

و لهذا (و لأني المدونة هذية مانراش فيها مجال لعرك مشخصن مأدلج) فإنو بمجرد أنو التعليق تشاف و تم التعرف على العنوان تم إرسال دعوة...

بالمناسبة كلما أمكن تم إرسال إيمايلات لمدونين (إلي بالتحديد يختلفو معايا في الراي) بش يبعثو إيمايلات متاع ناس أصحابهم للمشاركة في المدونة... حبيت نقول الحاجة هذية فقط في سياق الحديث على أنو فمة تمييز

و حاجة أخرى: ما قريتلكش تعليق على التعليق إلي تكتب الفوق بما أنك متحمس للمسائل إلي تناقشت في رديون

أية خليني نمشي نعمل حاجة تصلح في هل القايلة

غير معرف يقول...

بالطبيعة متحمس لحوارات رديون...
لكن فسرلي يا طارق سياسة الإقصاء والستالينية الزايدة لواش ؟؟؟
انا نستعرف الي مع كل ما امكنه من مقت لتيتوف و جماعت بوكشطة لكني مصر انهم يكونو ممثلين في كل تدوينة جماعية لانهم ''تمثيليين'' و يعطيو ميكروكوسموس عالمجتمع التونسي...لكن كيما هوما عندهم الحق فالوجود و علا الرغم من نزولهم لمستويات اوطى من عاشور،هو زادة عندو الحق و انتي حتى ما تطيقوش ما تنجمش تعدي عليه الجلم...

Tarek طارق يقول...

زبراطكمجينيف.. نحب نعرف ساعة كيف قاعد تكتب في التخلويض هذا صاحي و إلا لا؟!
إقصائية و ستالينية؟؟؟ بعد إلي كتبتو هذا الكل؟؟!! هاك إنت موجود و كيفك برشة.. و زيد المدون هذا تبعثتلو دعوة وقتلي تشافت الرغبة متاعو برغم إلي هو شلاكة.... و تقولي ستالينية؟؟!!!

مثبت إلي إنت صاحي؟؟

أية فيق علة روحك...