الفايسبوك... يا عمار

بناء على شهادات مدونين تونسيين (هنا و هنا مثلا)... قام عمار بحجب موقع الفايسبوك... توة أشهر لتالي فمة توانسة مشتركين في فايسبوك عملو خطوة استباقية و أسسو مجموعة ضد حجب فايسبوك و فعلا عمار كان في المستوى و استجاب للنداءات... لاحظت إلي فمة تعليق باسم "خليل التريكي" الخمسة متاع الصباح اليوم أعلن فيه إلي بش يقع الحجب... هذاية الرابط ليها.. آه حقة ما تنجموش تشوفوها...

تحديث (الساعة 6:30 مساءا وقت تونس): حسب آخر المعطيات فإنو الحجب في الوقت الحالي يشمل كان المشتركين في "بلانات"... فمة أقاويل أنو الحجب بش يشمل مشتركي توبنت و هيكزابايت...

مجرد أسئلة حتى تأكيد شمول الحجب جميع مشتركي الانترنت: هذية الطريقة المثلى بالنسبة للشباب التونسي بش يحتفل بحصول شاب تونسي على الميدالية الذهبية؟ كيفاش بش ندخلو كتوانسة و عرب نفتخرو بالملولي (هنا بالنسبة للي ينجم يحل فايسبوك) في أكبر منبر للشبكات الاجتماعية في العالم؟ هذاية المقصود يا عمار بجملة "الالتحاق بمصاف الدول المتقدمة"؟

نحط لهنا تدوينة مصعب للاطلاع على حيثيات عملية الحجب هذية بالذات... يظهرلي فيك مصعب إنت هو "المهندس الجديد"... :-)))

عمّار: ألو سي التيجاني
التيجاني: صباح الخير سيدي المدير
عمّار: سي التيجاني بالله اجا بحذايا حاجتي بيك
التيجاني: حاضر سيدي المدير

التيجاني يدق يعدّل الكرفات ويخزر لصباطو بش يتاكد انو مسيرج بالباهي ,ياخذ نفس عميق ويدق الباب بنعومة

عمّار: ادخل
التيجاني: صباح النور سي عمّار
عمّار: اقعد اقعد …
يخزر لمنشور قدامو … لحظات من الصمت
عمّار: تعرفشي موقع اسمو وجه الكتاب ؟
التيجاني: لا سيدي عمري لا سمعت بيه
عمّار: نعم ؟؟ صحيتك بابا تبركالله عليك ياخي فين عايش ؟؟؟ متعرفشي موقع وجه الكتاب ؟؟
التيجاني:سيدي آه تذكرتو …سمحني ماك تعرف صباح اثنين ومازلت مشربتش قهوتي
عمّار: باهي هات اعطيني عنوانو نحب نسكرو
التيجاني: داخل بعضو والعروقات شرتلا … عنو … عنوا …عنوانو سيدي ؟
عمّار: ايه نعم ايا فيسع
التيجاني حصل وحب يلصقها في طفل جديد مدخلينو عندو جمعتين. اوينو منها يمنع بجلدو وفي نفس الوقت يمقصو
التيجاني: لحظة ماو باش الامور تبدى مريقلة اتاو نعيطو لمهندس جديد ,هو الي لاهي بقاعدة بيانات العناوين

عمار يهز التلفون ويتصل بالطفل, دقيقتين ويكون في بيروه…

التيجاني: ايا اعطينا عنوان موقع وجه الكتاب
المهندس: نعم ؟؟
عمّار: ياخي متعرفوش ؟
المهندس: يفكّر شوي , آه قصدك موقع الفايس بوك ؟
عمّار: تسبلي في بابا ياللي متحشمش ؟؟
المهندس: لا سيدي المدير , اسم الموقع فايس بوك
عمّار: وهو عامل روحو يعرف اسم الموقع .. ايه تي ماو تكلم بالقوي ,مسمعتكش شتقول… ايا توا باش نسكروه.

عمارينزل على زر التشغير في الكمبيوتر الي قدامو … شاشة ويندوز 98 النسخة العربية …
يشد السوري … ابدأ ….قائمة البرامج …. ضصثقفغعع
تعديل موقع ,,لا ….إضافة موقع جديد …

عمّار: وينو الهاش
التيجاني: هاويها في الوسط سيدي
عمّار: تي عشرين مرة قلتلهم بدلولي هالكلافيي …بوطوناتها مش واضحين

A
S
E
B
O
U
K
.
C
O
M P H

بعد ربع ساعة وهو يكتب
Phasebouk.com

وبكل فخر واعتزاز وثقة في النفس ينزل على انتري
رسالة من الويندوز
الموقع غير موجود

عمّار: تي هاو الموقع مش موجود ؟؟
التيجاني: تراه نشوف … أي نعم الموقع مش موجود شنيا الحكاية ؟
المهندس: يبتسم ابتسامة خفيفة…تي لا مش هكا يتكتب العنوان
عمّار: تي قلتلهم هالكلافيي منتفاهمش معاها بدلوها… ايا اجا اكتبو انت مالا

يجي المهندس يكتب العنوان في 5 ثواني
عمّار: بشوي آقف آقف متعملش انتري خليني نثبت …يخزر هكا … يحاول يهجّي العنوان…مفهم شي…
أيا باهي صحيح هكّا …وينزل بكل قوة وعنف على البوطون انتري
رسالة من الويندوز …
تمّ حجب الموقع بنجاح
عمار وعلى محياه ابتسامة عريضة يهز التلفون … وبكل فخر واعتزاز اكثر من بكري

عمّار: احتراماتي سيدي …اوينو سكّرناه
**: باهي …طوط طوط طوط