مكبشين في الحوار مع عمار

ضد الحجب كيفها كيف أي مدونة أخرى ماهياش شركة بش تخاف لا تبدل عنوانها و ماعادش يجيوها كليونات... هي مدونة لاجئة كل مرة تنجم تبات في عنوان... طردها الافتراضي لا يزيد لا ينقص... و رغم إصرار عمار على المقص فإنو ضد الحجب مازالت مكبشة في مبدأ الحوار مع عمار...

أية قولي توة كيفاش عديت الصيف؟ و آش عامل في القربلة متاع المصاريف متاع العودة المدرسية و زيد فوقها رمضان؟ بالله فمة شكون وصاني بش نسئلك: وكالة الحجب تعطي منحة متاع أدوات مدرسية و العيد الصغير؟ و إلا ذراعك يا علاف؟ الحقيقة جا الوقت بش تعملو نقابة... و نحنا من هنا من مدونة "ضد الحجب" نعلنو دعمنا لمطالبكم الغذائية و حقكم في العمل النقابي... أو التنوقيب كيف ما يقول جدي... أية جا وقت الكونجي عادة توة و عمل الحصة الواحدة... قعدت كان إنت ماتكركرش؟ خاصة مافماش منح... ملا خدمة هذية... بطال خير يا رسول الله... الشر و الشمنطر... ماني قتلك نحنا نعلنو من هنا دعمنا لمطالبكم... أعمل إضراب و إتلهى شوية بالصغيرات... راك شقيت في هل الصيف لزرق... من حقك يا أخي... تاخذ كونجي....

بالله كيفاش عديت الصيف؟

.....