ذكاء عمّاري نادر

مسلسل الفايسبوك مازال متواصل و عمّار فاق مؤخرا اللي هو ينجّم يحجب بعض المجموعات من غير ما يتلز أنّو يسكّر الفايسبوك بكلّو...على الأقل الحجب المرة هاذي ما كانش اعتباطي و انجموا نفهمو الأسباب اللي مصدرها واحد وهو أنّو عمّار ما عندوش روح رياضية... حتّى لتوّة مجموعتين محجوبين هاذي و هاذي... لكن بالطبيعة ثمة ثغرات تمكّن من الوصول ليهم من غير بروكسي حتّى و هو ما يدّل على أنّو الذكاء يحضر و يغيب عندو... باهي عالطاير ملاحظة لبعض الإخوة اللي متقلقين مالحديث عالفايسبوك حتى لتوّة ... يا سيدي عمّار ما عندو ما يعمل كان خدمة المقص و أحنا ما عندنا ما نعملوا كان نحكيوا على الفايسبوك... يقول القايل وقتاش يوفى المسلسل مالا... هذاية سؤال صعيب لكن عمّار هو الوحيد اللي ينجّم يجاوبك عليه... الكرة في الملعب متاعو لكن أحنا مُصرّيـن نشدّولوا ڤول