يكفينا من التهجمات ولنتقدم بخطوة عملية الى الأمام
حصلت مؤخرا عديد التطورات فيا يخص الجمعية ومنها استقالت البلوغوسفيرة لينا من مدونة فردة ولقات أختها وتهجم سي قاسم على صديقنا سفيان من نفس المدونة يحب يقيلو من الجمعية اضافة لبروز مجموعة جديدة من الدساترة تسمي في روحها بجمعية المدونين الوطنيين الأمر الي خلينا ندخل باش نقول كليمتين ونحط النقاط على الحروف..
أولا ونيابة عن باقي البلوغسفيرات، اذا يسمحولي طبعا، نطلب من أختنا لينا عدم التسرع وترك مشروع الجمعية خاصة وأنها من المؤسسين لها الفكرة، ثانيا نحب نقول الي كونو مافما حتى شخص في الفترة الراهنة عندو الحق باش يلغي شخص آخر والا يقيلو من هاالمشروع خاصة وأننا في فترة تأسيس ومازلنا موضعناش قانون تأسيسي والا نظام داخلي تخولو فصولو اقالة أو تجميد أو سحب عضوية أي منخرط في الجمعية خاصة اذا كان من باعثيها، ثلاثة، يا بلغسفارات فيقو واتحدو راهو ولاد التجمع قاعدين يأسسوا في جمعية مدونين موازية لجمعيتنا ومسمينها نكاية فينا جمعية المدونين الوطنيين وحطين السيجل متاعها تصويرة الرئيس بن علي ويحب يسحبو البساط من تحت ساقينا وتعريف أنفسهم بأنهم مدونيين وطنيين فاها نية مبيتة باش يخرجونا نحنا عملاء وخونة وكأنو الي ما ينتميش لجمعيتهم والا لحزب التجمع الدستوري مهوش وطني وميحبش تونس وهوما الأمناء الوحيدين على ها الوطن ..الحاصل حاجة مهيش معقولة بكل ...كيف أك الشعار المعروف الي رفعتو أمريكا في حرب على ما تسميه الارهاب يا تكون معانا يا تكون ضدنا ..
المختصر المفيد نرى أنو آنو الآوان لقيام جمعيتنا وما نبدوا ها الخطوة التاريخية الا ما نصلحوا ذات بيننا ونلمو شملنا ونحافظو على رصيد الثقة الأدنى الي تكون بيناتنا ..نختلفوا ايه لكن نكفروا بعضنا (بالمفهوم الشامل للكلمة ) لالالالالالالالالالالالالا...
اقتراح بعث مدونة تكون ناطقة باسم عموم المدونيين باش يعطيو فاها رايهم في الشأن العام وسياسة البلاد فكرة صائبة ولكن توصيفها بالوطنية ماهو الا رد فعل وماهواش فعل مدروس خاصة وأنو الجماعة الدساترة الي يحتكروا في الوطنية بعاد علاها كيلومترات لأنهم بسياستهم دخلو البلاد في حيط وأحنا ماناش في حاجة لاتيكات الوطنية باش نثبتوها وانما نحنا بحاجة لتقديم بديل تدويني يرتقي على السخافات والانبطاحيات الي ينشرو فاها هاك المتخلفين على مجموعتهم وكأنو عبادة الصنم متاعهم هي قمة الوطنية والي يعطي راي مخالف عميل ويستحق الضرب بالكرتوش..الحاصل يا جماعة نقوللكم فازي وهاني معاكم مستعد باش نساهم في اثراء ها المدونة الرسمية المتحدثة باسم جميع البلوغسفارات وبون كوراج لينا الكل.
بدر السلام الطرابلسي
ليست هناك تعليقات:
إرسال تعليق